"Molla Nəsrəddin" jurnalının yaranmasının 117-ci ildönümü qeyd olunub

Aprelin 20-də Cəlil Məmmədquluzadənin Ev Muzeyində "Molla Nəsrəddin" jurnalının yaranmasının 117-ci ildönümü münasibətilə tədbir keçirilib. Tədbirdə muzeyin direktoru Aytən Ələkbərova bildirib ki, 20 aprel 1906-ci ildə "Sizi deyib gəlmişəm, ey mənim müsəlman qardaşlarım!" çağırışı ilə mübarizə meydanına atılan jurnalın nəşri Azərbaycan ictimai fikir tarixində yeni dövrün-"Molla Nəsrəddin" dövrünün əsasını qoyub. Mübarizə amalını xalqın xosbəxtliyi yoluna həsr edən jurnal ilk nömrəsindən başlamış son nömrəsinə qədər "vətən, millət, dil" ideasına xidmət göstəribdir. Cəlil Məmmədquluzadənin dili ilə desək : “Molla Nəsrəddin" i təbiət özü yaratdı , zəmanə özü yaratdı” Tədbirdə Naxçıvan şəhər Qızlar Liseyinin müəllimi Gülşən Ağayevanın "Molla Nəsrəddin" necə yarandı?” mövzusunda çıxışı dinlənilib. Liseyin 5-ci sinif şagirdləri Cəlil Məmmədquluzadənin dəyərli fikirlərini qiraət ediblər. Sonda "Molla Nəsrəddin-117" başlıqlı sərgiyə və muzeyin ekspozisiyasına baxış olub.